एक स्त्री म्हणून जगताना तिच्या जगण्यातल्या वेदना, दैनंदिन कामकाजात अपुर्ण राहिलेल्या तिच्या सुप्त इच्छा, आकांक्षा कायमच जाणल्या आहेत. जाणलेल्या गोष्टींत कोणतीही उणीव न ठेवता स्त्रीच्या असलेल्या अस्तित्त्वाला आणखीन चार चाँद कसे लावता येतील याचा कायमच चौफेर दृष्टिकोनांतून विचार करत गेले. तिच्यात उपजत असलेल्या कलागुणांना व्यासंग देतांना व्यासपीठाची निर्मिती केली आणि उदयास आले ते म्हणजे “कनि महिला मंच.”

जागतिक महिला दिनाच्या पुर्वसंध्येला “कनि” ची मुहूर्तमेढ रोवली गेली. २०२१ ते २०२२ च्या काळात म्हणजेच वर्षभरांत “कनि” मध्ये समाविष्ट असलेल्या महिला सभासदांसाठी प्रत्येक महिन्यांत एक किंवा दोन असे वेगवेगळ्या विषयांवर उपक्रम राबवत गेले. सुरुवात केली तेव्हा त्याच स्वरुप आणखीन विस्तारेल हा कणभर देखील विचार केला नाही कारण, “कनि” च्या स्थापनेआधी वेगवेगळ्या स्थरांतून म्हणजेच २००५ पासून स्त्रियांसाठी सामाजिक, शैक्षणिक आणि सांस्कृतिक पातळीवर यशस्वीपणे उपक्रम राबवत आले आहे. बेरोजगारांना रोजगाराची संधी, गरजूला कपडे, अन्नधान्य वाटप ही मदतसेवा कायमस्वरुपी सुरुच असायची. अन्नधान्य वाटप ही मदतसेवा कायमस्वरुपी सुरुच असायची.

गरजूंसाठी तठस्थपणे उभे राहून कार्य करण्याची जिद्द माझे आई वडिल, आणि पती श्री. उल्हास कदम यांच्या आचरणातून मिळालेली ही शिकवण कायमचं उराशी बाळगून आहे. हाच ध्यास मनात ठेऊन कार्य करत असतांना आजवर कित्येक देवदासींच्या मुलींना दत्तक घेऊन त्यांच्या शिक्षणाचा आणि जगवण्यासाठीचा सर्वतोपरी प्रयत्न करित असते. शिक्षणाचं माहेरघर म्हटलं जाणाऱ्या या आपल्या पुणे शहरांत मुलींच्या राहण्याची सुव्यवस्था व्हावी या विचारांतून गेली अनेक वर्षे मुलींसाठी हॉस्टेल यशस्वीपणे चालवत आहे.